Psa 4 | AmhNASV | STEP | ለመዘምራን አለቃ፤ በበገናዎች የሚዜም የዳዊት መዝሙር። የጽድቄ አምላክ ሆይ፤ በጠራሁህ ጊዜ መልስልኝ፤ ከጭንቀቴ አሳርፈኝ፤ ማረኝ፤ ጸሎቴንም ስማ።

Psalms 4

የሠርክ ጸሎት

ለመዘምራን አለቃ፤ በበገናዎች የሚዜም የዳዊት መዝሙር።

1 የጽድቄ አምላክ ሆይ፤
በጠራሁህ ጊዜ መልስልኝ፤
ከጭንቀቴ አሳርፈኝ፤
ማረኝ፤ ጸሎቴንም ስማ።

2 ሰዎች ሆይ፤ እስከ መቼ ድረስ ክብሬን ዝቅ ^{▼▼ወይም ወደ ራሳችሁ} ታደርጋላችሁ?
እስከ መቼስ ድረስ ከንቱ ነገርን ትወድዳላችሁ? ሐሰትንስ ^{▼▼ወይም የሐሰት አማልክት} ትሻላችሁ? ሴላ
3 እግዚአብሔር ጻድቁን ለራሱ እንደ ለየ ዕወቁ፤
እግዚአብሔር ወደ እርሱ በተጣራሁ ጊዜ ይሰማኛል።
4 ስትቈጡ ኀጢአት አትሥሩ፤
በዐልጋችሁም ላይ ሳላችሁ፣
ልባችሁን መርምሩ፤ ጸጥም በሉ። ሴላ
5 የጽድቅን መሥዋዕት አቅርቡ፤
በእግዚአብሔርም ታመኑ።
6 ብዙዎች፣ “አንዳች በጎ ነገር ማን ያሳየናል?” ይላሉ፤
እግዚአብሔር ሆይ፤ የፊትህ ብርሃን በላያችን ይብራ።
7 ስንዴና አዲስ የወይን ጠጅ በብዛት ባመረቱ ጊዜ ከሚያገኙት ደስታ ይልቅ፣
አንተ ልቤን በታላቅ ሐሤት ሞልተኸዋል።
8 በሰላም እተኛለሁ፤ አንቀላፋለሁም፤
እግዚአብሔር ሆይ፤ ያለ ሥጋት የምታሳድረኝ አንተ ብቻ ነህና።